Go fola moyeng re fodile le metse o re agetše,
Ka malapeng a rena re dutše ka lerato le khutšo
Ruri ka nnete o mmago setshaba wena
Go tšwa maleng a Tjiane ga-Mphahlale, Bethlehem motse wa go nyatšega naledi e tagafetše
Ka šakeng la dipere, le ge nkare ke nyorilwe a go tlala morutlwana meetse ga a gona,
Eupša Kgošigadi e belegwe.
Ee, ke ra yena Boledi wa Ngoato,
Ke lekgalaka la Mogodumo ngwana lesoro la mare
Ga se moopedi wa manyalo feela,
Aowa, tša bo “seapea potsa ke yena yo, ga a na taba ke mosadi,” ga se tša gagwe
Tše dinaka ga se tša go rwešwa.
Ke Ramadimetja wa samma laela le Mosadi ke Lefotwana
Nnete gona tsela ebile ye telele.
Ke semumu sa ga mang se ka šitwa go hlalosa ka mabothakga a ‘Sadi o tsamaiša matepe?’
Sekgameetse mogolo wa Mepipi le Seatlantepeng o rathagantshitše masantase a bana bešu
Ha a! gape a go binwe go jewa leoto.
Nnete gona o modirela leago wa maphelo a rena.
Lesego la gago la dikoti marameng ke seka sa lethabo leo re nago le lona ka lebaka la melaetša ya gago
Bontši ba šegofala feela go no bona sefahlego sa gago
Ka nnete re holofetše, re tseba ge o ka rema gabedi gararo, ra fola moyeng.
A Modimo wa bo Aborahama a go di re ka botho le lerato
Kokeletšo ya matšatši a go phela e be monwana le lenala go wena.
Marato a mantši ke ao
Mpheng setsiba ke bineng koša ke re: Mošate!!!!!!
Ka Sereto theto re reta le go rweša dipataka mogale gare ga bagale. Re lebelela tše dibotse tšeo a di dirilego setshabeng. Ka fao, ke bone e le toka ebile go swanela gore ke ngwale sereto theto se ka seopedi sa go tuma kudu kudu go di fetiša ka moka sa mmino wa manyalo go tšwa Profenseng ya Limpopo, Afrika Borwa. Lebaka e le gore mmino wa seopedi se o ikgethile ebile o wa agiša go akaretša le go tlohleletša maitshwaro a mabotse setshabeng. Go fetiša fao, o raloka karolo ya bohlokwa go godišeng ga polelo ya Sepedi le go boloka dithokgola (leleme la Sepedi la dika le diema) tša borakgolokhukhu- Tilo ngwana Rashaka Mokgopo
Ka nnete re batho ka wena sa mma malapa oagile wa fa maele ka botjohle bja gago .mippip,setshwenyege ngoana mma, Mohlapa wa mogala yeo ke e ratago kudu,bowa gae WOW what a touching song but that’s the true story .ke go ratela molaetja wa gago sechaeng,maphelo a rena oa kanafatja motsotso ka motsotso ra leboga kgadi ya manyalo tswela pele ka moshomo wa gago o month botSe owe o dirago .Modimo a go babalele.Ra leboga seaga malapa.